Am Fritig Obe hän sich 6 mehr oder weniger erfahreni OL-/Marathonläufer mit em Auti nach Schwarzsee begä. «Do hets jo gar keini richtige Bärge» (Zitat Simon W.). Das Zitat het sich nit so ganz beworheitet. Mir hän nämlich spöter selber müesse erfahre, dass me au an weniger hoche Bärge Schmerze ka erlide. Nach eme guete eifache z'Nacht hän sich alli ans Bearbeite vo ihrer Karte gmacht. Wo das erledigt gsi isch, sin mir gmüetlich in unseri Bett, im wüsse, dass es in dr negschte Nacht nümm so gmietlich wird.
Am negschte Morge sin mr den nacheme guete z'Morge abmarschiert zur Sässelbahn. Dört isch au scho s’ erschte Missgschick bassiert, denn zwei Herre hän unte an dr Bahn ihri Karte vergässe. Nach däm sie den au no ufe ko isch, isch die ganzi Sach ändlich los gange. Unser Team (René und Marius) isch bi de Koordinate e bitz langsam gsi, was zur Folg ka het, das mr scho dr erschti Hügl imene nit so agnähme Tempo hän müese erklimme. Das Tempo isch den erscht wider abe ko, wo mr nüm gwüsst hän wo mr sin, doch do sin uns dr Sämi und dr Simon entgege ko, wo uns hän könne witerhälfe. Nach witere aschträngende Stund sin mr den äntlich im Übernachtigs-Camp a ko. Dört hän mr uns imene kühlere Bach als dänkt, könne abkühle und hän uns den mol ans Znacht gmacht. Für das brucht me jo bekanntlich e Gaskocher, jedoch wenn me dä no nie brucht het, kas mängisch au plötzlich zu grössere Gasusbrüch ko. Nach dem mr alli dr Znacht, e bar sogar mit eme 4 gang Mönü, gnosse hän und die spezielle Hering aglugt hän «Das sin kei Pickel, das sin Hering.» (Zitat Sämi W.) ischs no ind Alp-Beitz gange, wo mr uns no öbis Kleins sälber spendiert hän.
Am negschte Morge hän mr den müese no 35 min (220 Hohemeter) zum Start laufe. Den sin mr schomol user Atem am Start a ko und denn ischs erscht richtig los gange, denn hütt isch die längeri Etappe vo de beide Täg agstande. Nach em Start isch es grad mit ere schöne Stigig losgange, bi dere sich me wie e bitz am Mount Everest gfühlt het. Dört het me no so öbbe möge, doch spötischtens in dr Helfti het me d Bei gspürt und me isch jo erscht in dr Helfti gsi. Es het sich brutal zoge und «Ich ha no nie so e asträngende Sport-Event gmacht» (Zitat René H.). Und do me sich jo au verpfläge mues, au no «Hesch au schomol e halb Stund lang amene Biberli ume gwürgt?» (Zitat Felix W.). Es isch hart gsi und do kömme au schomol sötigi Gedanke wie: «Nögscht Johr kasch e andere Partner sueche» (Zitat Carole W.). Mir sin den aber trotzdäm alli im Ziel a ko und hän uns dr M-Budget Ice Tea, wos gä het, gnüsslich lo schmecke. Es isch e super Erläbniss gsi, au wenn ich nit weis wie guet ich morn no ka laufe. Danke no am Felix für die gueti Organisation. (Bericht Marius H.)
Rangliste 2019 siehe Kategorie 3.1 und 3.4
Save the date for next year: 15./16. August 2020 in St. Antönien (GR): hinter dem Mond links SIMM Swiss International Mountain Marathon
